Nyang Bae ntuh Elu, bukan Agame nyang buat Elu jadi Bae

"Agama Tidak Membuat Orang Jadi Baik

Tidak ada satu Agama pun di dunia, yang bisa membuat orang jadi baik. Yang ada; Orang baik dan mempunyai niat yang baik, menggunakan Agama apa pun, untuk tujuan kebaikan. Pasti dia akan jadi baik.
Jadi pilihlah Agama yang sesuai dengan Hati Nurani."

Bekasi (WartaBetawi) - Ntuh kate-kate gue salin dari laman sebele. Pertamenye gue kesel bacanye, pas gue pikir-pikir lagi, ternyate bener kate ntuh orang.

Nah elu banyangin dah, kalau emang Agame bise seketike buat orang jadi bae, lha kita kagak perlu nyang namanye penjare. Karene bisa aje bim sala bim kite masukin ntuh orang-orang jahat ke Agame nyang bise langsung bikin orang jadi bae. Jadi dah orang-orang ntuh langsung pade jadi orang-orang bae.

Kenyataannye khan kagak gitu, orang berAgame, ternyate berkelompok buat kejahatan nyang kagak karuan. Jadi gue yakin dah same pernyataan di atas. Nyang bae kudu diri kite duluan, bukan cari Agame yang bise buat kite jadi bae.

Nah mulain dari sekarang nih ye, Elu kudu punye Budi Pekerti dulu, seperti ajaran Leluhur kite-kite orang, baru dah Elu pilih tuh Agame nyang cocok buat Elu pade.

Sekarang nih, banyak orang nyang berpakaian gayenye doang kaye orang  bae-bae, padahal hatinye setan.

Mending Elu kagak usah ngaku-ngaku Agame Elu ape? Tapi nyang penting, Elu Berbudi Pekerti.

Tentang Sorga ame Nerake, Elu serahin aje ame Tuhan YME. Soalnye sampe detik ini, belum ade orang nyang perne ke Nerake atawa ke Surge, nyang balik ke Bumi, terus kasih testimoni.

Kagak mungkin orang mau masuk Surge harus bunuh ciptaannye sang Pencipte, gile aje kali. Tapi nyang kite lihat sekarang nih, orang mati-matian bunuh orang nyang kagak seiman, katanye buat masuk Surge... Elu waras? (SSM)

Foto : Istimewa