Si Pitoeng Robinhood dari Betawi

Target korban dari Robinhood Betawi nih, cuman Belande sama antek-anteknye aje, jadi kalu kakek elu orang kaye yang bukan antek Belande, kagak usah takut sama si Pitung

Pade taun 1892 Si Pitung dikenal sebage “One Bitoeng”, “Pitang", terus jadi “Si Pitoeng” (Hindia Olanda 28-6-1892:3; 26-8-1892:2). 

Setele ditelusurin ame van Till (1996) nyang diambil dari Hindia Olanda 22-11-1892 (Koran Terbitan Malaya (Malaysia). 

Laporan pertame nih surat kabar nunjukin bahwe schout Tanah Abang mencari rumah “One Bitoeng” di Sukabumi. 

Pas ditemuin rumahnye, ditemuin di sane  Jas Hitam, Seragam Polisi ame Topi, ame beberape perlengkapan lainnye nyang digunain bakal nyuri kampung (Hindia Olanda, 28-6-1892:2). 

Lewat atu bulan, polisi balik ngacak-ngacak rumahnye lagi, nah ditemuin dah uang 125 gulden. Tuh uang dikire uang curian dari Nyonya De C ame Haji Saipudin orang Bugis dari Marunda (Hindia Olanda 10-8-1892:2;2; 26-8-1892:2). 

Abis ntuh Si Pitung gunain senjate bakal nyuri pade tanggal 30 Juli 1892, pas ntuh Si Pitung ane lima kawananannye (Abdoelrachman, Moedjeran, Merais, Dji-ih, ame Gering) terobos rumah Haji Saipudin  sambil ngancem Haji Saipudin bakal ditembak.

Tahun 1892, Pitung ame temennye ditangkep polisi, abis Kepala Kampung Kebayoran terima sogokan 50 ringgit (Hindia Olanda 26-8-1892:2). 

Abis ditangkep, kire-kire sebelum setahun, pade tahun 1893, Pitung ame Dji-ih berencane kabur dari tahanan Meester Cornelis. 

Kaburnye si Pitung ame Cji-ih ternyate dibantu ame Petugas Penjare, die ngakuin minjamin belincong (semacem linggis) ke Si Pitung, nyang kemudian digunain bakal bongkar atep ame manjat dinding (Hindia Olanda, 25-4-1893:3; Lokomotief 25-4 1893:2).

Dari kasak kusuk, si Pitung katanye perne nampakkin diri di depan wanita di perahu, pake nama Prasman. Polisi intel coba cari di kapal ntuh (Hindia Olanda, 12-5-1893:3), tapi hasilnya nihil. 

Karene sulitnye ditemuin untuk ditangkep, harga untuk penangkapan Pitung jadi naik segede 400 Gulden. Belande tadinye mau tembak mati si Pitung di tempat, tapi ada yang nyaranin, kalo si Pitung ditembak, malah jadi berabe, karena bakal bikin semangat patriotik, jadi akhirnya niatmye Belande diurungin oleh kepolisian Batavia, untuk tembak di tempat.

Denger dirinye disayembarain pake harga nyang tinggi, Pitung malah ngelakuin pencurian pake kekerasan, termasuk pake sejata api. Akhirnye Pitung ame Dji-ih ngebunuh seorang polisi intel nyang bername Djeram Latip (Hindia Olanda 23-9-1893:2). 

Dji-ih ditangkap lagi di kampung halamannye sendiri, waktu die lagi sakit. Saat ntuh Dji-ih lagi pulang kampung untuk berobat.  

Kepala kampung (djoeragan) ngelaporin ke Demang, yang terus merintahin tentare untuk tangkap si Dji-ih di rumahnye. Karena die lagi sakit, die kagak berdaye untuk melawan, walaupun saat ntuh jaraknye  pistol dekat ame die (Hindia Olanda 19-8-1893:2). 

Die nyere tanpe ngelawan. Nah dasar Belande banyak akalnye, terus Belande ngelansir berite di Java-Bode (15-8-1893:2) kalo Dji-ih katanye kabur ke Singapure. Informan nyang ngebocorin dimane Dji-ih berade, akhirnye ditembak mati si Pitung di deket Batavia beberape minggu kemudian.

Lepas beberape bulan kemudian, pade bulan Oktober, Kepala Polisi Hinne dapet info dari dari informan, kalo si Pitung keliatan di Kampung Bambu, kampung nyang letaknye diantare Tanjung Priok ame Meester Cornelis. 

Terus ternyate Pitung pindah lagi ke arah pekuburan di Tanah Abang (Hindia Olanda 18-10-1893). Nah disane tuh Hinne menembak si Pitung dalam baku tempbak. 

Pitung ditembak di tangan, tapi Pitung kagak mau kale, dengan membalas tembakan Hinne. Trus  Hinne menembak lagi, tapi meleset, baru dah peluru ketige kena dada si Pitung. 

Setelah satu hari kematian Pitung, hari Senin, jenazah dibawe ke pemakaman Kampung Baru pada jam 5 sore.

Setahun kemudian Hinne dipromosiin jadi Kepala Polisi Distrik Tanah Abang, bakal ngawasin seluruh Metropolitan Batavia-Weltevreden. 

Untuk mencege kagak ada Pitung-pitung yang lain, Belande menjage makam Pitung biar kagak ada yang bise ziarahin.

Foto Ilustrasi : Istimewa